GR11 32 etapa: Esparvers-Puigcerdá 360º eta EBn

GR 11 Transpirenaika ibilbidearen 32. etapa: Esparvers-Puigcerdá

Esparvers-Puigcerdá etapa jaitsiera handiko ibilbidea dugu, nahiz eta ibili beharreko 24 kilometroen buruan 900m-ko garaiera gainditu behar dugun, jaitsi beharrekoak 1700m inguru dira eta.

Garaiera nagusietan ondo seinaleztatutako eta agerikoak diren mendi-bide eta bidexkak nagusi dira gehienbat. Aldiz, auto bidez iritsi daitezkeen gunetara edota herriren batera gerturatu ahala, seinaleztapenen inguruko zenbait arazo suertatzen dira (2020. Urrean) eta batzuetan desagertzeraino ere iristen dira. Harira, Saneja herriaren atariko bidegurutzean ageriko seinaleztapen ezak (herrian bertan berriro ere agertzen dira) okerreko bide bat hartzea ahalbidetu zuen. Bide zuzenak, Saneja herria zeharkatzen du eta errepidetik Puigcerdá aldera jotzen du kanpinaren ondotik, guk hartutakoa haatik, aurkako aldera egiten du asfaltotik at, beste bide interesgarri bat eginez.

INFORMAZIO BALIOGARRIA

meteoblue

ELUR-BULETINA

TRACK-A DESKARGATU

NOLA IRITSI

ZAILTASUNA ETA ARRISKU MAILA

Método de Información de Excursiones (MIDE)

MIDE metodoa, mendiko ibilbideen zailtasun- eta arrisku-maila baloratzeko metodo bat da, eta Federación de Deportes de Montaña y Escalada-k (FEDME) gomendatutakoa dugu honakoa, beste federazio batzuen artean. Istripuen prebentzioa du helburu, ibilbideen eskakizun tekniko eta fisikoaren irizpideak bateratuz. Horrela, horien sailkapen objektiboagoa lortzen da.

Informazio-koadro bakoitzak bi zutabe ditu: ezkerrekoak ibilbidearen erreferentziazko informazioa du, hala nola ordutegia, desnibelak, distantzia, etab. Bestalde, eskuineko zutabean ibilbidearen zailtasunaren hainbat alderdiri buruzko informazioa agertzen da. Balioespen-eskala 1etik 5era neurtzen da (txikienetik handienera).

Metodo horrek oinarrizko informazioa ematen du ingurune aldakor batean; beraz, kontuan izan behar dugu lurraren baldintzak nabarmen alda daitezkeela. Horregatik, abiatu aurretik ibilbidearen egoera kontsultatzea gomendatzen da beti.

IBILBIDEAREN DIAGRAMA

IBILBIDEAREN TRACK-A AZTERTU EZAZU

Diagrama track-arekin sinkronizatzen da, desnibelek ibilbidean zehar izan duten bilakaera aztertzeko.
Aukeratu track-eko edozein puntu mapan, eta diagraman proiektatuta ikusi ahal izango duzu.
Egin klik erreferentzia-puntuen gainean, horiek ezagutzeko eta kanpoko mapa batean kokatzeko.

IBILBIDEAREN DESKRIBAPENA

Esparvers-Malniu

PORTELLAKO IGOERA

Esparvers-Puigcerdá ibilbidea Cabana dels Esparvers etxola kokatzen den lauan hasten dugu, ekialdera begira. Laua bukatzen den gunera iritsi eta ezker aldeko mazela zeharkatzen duen harridun arrapala igotzen dugu, jarraian IM aldera jo eta beste lau batera iritsiz.

Lauaren erdiko seinale tantaiak Cap de Creus lurmuturrera iristeko 233Km geratzen zaizkigula gogorarazten digu eta bide batez bertara iristeko eskuin aldera jo behar dugula adierazi ere. Errekaren beste aldera egin eta HE norabidean gorantz hasten gara, basoaren azpiko mugaren albotik. Behin basoaren muga jaisten den eremura iritsita, IE aldera bira egin eta zuhaitzen artean sartzen gara.

Zuhaizti eta soilguneen artean goranzko diagonal bat burutu ondoren, bideak ekialderantz jotzen du eta penditz sendodun hegalari zuzen aurre egiten dio sigi-saga estu baten bidez. Malda baretu egiten da soilgunera iristerakoan eta bideak HE aldera egiten du berriro ere basoan sartuz.

Basotik irten eta behin betiko atzean uzten dugu Tosseta de l’Esquella mendiaren hego-isurialdea eta mendebaldeko mazela lotzen dituen gandor belartsuan. Gandorrean gora metro batzuk burutu eta ekialderantz bira luze bat egiten dugu, Tosseta, Bony de Manyer eta Roc de Lliça mendien goialdeek bat egiten duten zirkura iritsi arte.

Malda gogorrenak gainditu eta goialdeko belardian EIE norabidean jarraitzen dugu, ageriko biderik gabe, aztarna eta zedarriei jarraituz Portella de Calm Colomer lepora iritsi arte.

MALNIURA JAISTEN

Aurreko etaparen nondik norakoak memorian gorde nahian, Ibilitakoari azken begirada eskaini eta mendatearen aurkako aldetik jaisten hasten gara, aurrean dugun Puigpedrós mendia erreferentzia gisa hartuta.

Sierra de l’Esquella mendigunea ixten duen magala jaitsi eta Estany Dels Minyons eta Estany Dels Aparellets lakuen ondotik igarotzen gara, hegoaldeko ertzetik gertu. Azkeneko lakuari eusten dion hegoaldeko magal txikia igo eta ekialderantz jotzen dugu Puigpedrós mendiaren aurrean dagoen harkaitz formaziorantz. Iritsi aurretik, HE aldera egiten dugu ageriko bidetik.

Gutxira eskuin aldean dagoen laku txiki baten mailara iristen gara eta lursailaren orografiari jarraituz, EIE aldera bira egiten dugu Puigpedrós mendiarantz jaisten den kanaletik. Kanalaren oinean Refugi Folch y Girona aterpea kokatzen da.

Aterpearen ondotik hegoalderantz bira egin eta erreka topatu arte jaisten gara. Beste aldera egin eta aurrean dagoen muinoa igotzen dugu ageriko biderik gabe. Goialdean badago Costa de Montmajor mendiaren HM hegal harritsura sarbidea ematen duen arrakala txiki bat, margo goridun aztarna eta zedarri bat atarian duena. Kasuan, ibilbide birtualean aurkezten dugun ibilbidetik metro batzuk beherago.

Hegalean sartu eta beste alderaino mozten dugu, terraza belartsu batek hegoaldeko isurialdean sartzen gaituen arte. Aurrekoan bezala, honen aurkako aldera jotzen dugu maila mantenduz. Magaletik ibili ondoren, hegoalderantz bira eginez, Pedradeta mendia basoan barrena inguratzen dugu eta zuhaiztia atzean utzi, behin ekialdera begira jarri garenean, el Pla izeneko laura iritsiz. Minutu gutxiren buruan Estany Sec urtegira eta ondoan duen Refugi de Malniu aterpera iristen gara.

Malniu-Feixa

BOSC DE TARTERÈS BASOAN

Aterpearen aurrean dagoen iturrian ontziak urez bete eta ekialderantz jotzen dugu, ubidea zeharkatzen duen zaldainaren beste aldera eginez. Bosc de Tarterès basoko mendi-bide turistikoan 250m inguru ibili ondoren, lau txiki batera iristen gara. Jarraian harriz beteriko arrapala igotzen hasi eta IIE aldera begira gaudenean, seinale tantaia bidearen eskuin aldean duen bidebanatze batera iristen gara. Eskuin aldeko bidea hartu eta berriro ere bakardadean gora egiten dugu. Berehala bideak eskuin aldera guztiz bira egin eta basoan barneratzen gaitu ageriko bidetik, HHE norabideari jarraituz.

Pasarte honetan, lakura doan errepiderantz zuzen amiltzen den hegalaren ertzetik gertu jarraitzen dugu EHE norabidean. Mendi bide honek ez du ageriko seinaleztapenik eta tarteka, bidea guztiz desagertu egiten da.

Zuhaitzen artetik irten eta belaze batera doan aldapa igotzen dugu. Belazearen eskuin aldean, basoaren mugaren ondotik Feixako pista doa. Hurrengo kilometroa IE aldera burutu behar dugu, pista zein alboko belazetik, Eskuin alderantz belaze handi bat zabaltzen den arte. Molleres de la Feixa lauaren atarian, pistaren eskuin aldean kokatzen den seinale tantaiak pista utzi behar dugula adierazten digu.

Feixa-Guils de Cerdanya

HERRIETARA BERRIRO

Tantaiaren ondoan gaudela, HE norabidea hartu eta belazea zeharkatzen dugu Refugi de la Feixa aterpetik datorren pista topatu arte. Gurpilen arrastoari jarraitzen diogu eta zuhaiztian barneratzen gara EHE norabidean, aurrean dugun muinoa igotzen dugun arte. Jaitsiera EIE aldera hasten dugu.

Zuhaitz zerrenda bat igaro ondoren, bideak EHE norabidea berreskuratzen du eta belarretatik bideratzen gaitu, oharkabean albo batean utzi dugun Roques Feres gailurraren ondotik igarotzen den bidearekin bat egin arte. Bideak pista batera eramaten gaitu zuzen. Bertako seinale tantaiak, pistaren beste aldera egin eta norabiderik aldatu gabe, belazea zeharkatu araziz, berriro basoan barneratzen gaitu.

Gutxira, basoko bidea banandu egiten da eta basotik ateratzen gaituen adarrari jarraitzen diogu HHE norabidean, Peransalt gailurraren ondoan. Basoko mugaren ondotik gailurra inguratu eta HE aldera jaisten jarraitzen dugu, Puigcerdá begien aurrean dugularik.

Malda areagotu egiten da eta beherago dagoen hesi baten atakara zuzen egiten du. Hesiaren beste aldean, ekialderantz bira egin eta Pla de Peransalt laura iritsi arte zuzen ekiten diogu beherako bideari. Lauan, seinale tantaia bat dugu zain.

Norabideari eusten diogu gandor belartsua ezker aldetik igaro eta mendi-bidea ageri den arte. Bideak Guils de Cerdanya herrira doan pistara eramaten gaitu azkar batean.

Herrira IM aldetik sartzen gara eta kalean behera jarraitzen dugu enparantzara iritsi arte.

Guils de Cerdanya-Puigcerdá

PUIGCERDÁ JOMUGAN

Carrer del Mig kalea jaitsi eta herritik aldentzen gara errepiderantz. Ezker aldeko bide-bazterretik 200m inguru ibili ondoren, ezkerretik abiatzen den pista hartzen dugu. Pistak IE aldera egiten du eta lehenengo bidegurutzean, seinaleztapenari jarraituz, erabateko bira egiten dugu HHE norabideari jarraituz. Beste 200m burutu ostean, berriro ere errepidearekin egiten dugu topo.

Bazterretik jarraitzen dugu Saneja herriaren atariko bidegurutzera iritsi arte. Errepidearen beste aldean, ohiko mendi-bideak seinaleztatzeko tantaira gerturatu eta hara non, GR11 bidearen arrastorik ez dugun ikusten (grabaketa egin genuen garaian).

GR11 bideak, Saneja herria zeharkatu eta Puigcerdá aldera doan errepidetik jarraitzen du, atariko zubiaren aurrean etapari bukaera emateko. Aipatu beharra dago Saneja herrian bertan seinaleztapena berriro ere ageri da.

Hala ere, seinaleztapenik ikusi ez eta aurkako bidea hautatzen dugu, eskuin aldera. Metro gutxitan, errepidea utzi eta ezkerretik doan bidean barneratzen gara, Pla de Saneja laua zeharkatuz Sant Martí d’Arabora iritsiz.

Sant Martí de Cerdanya baselizaren alboan, ezker aldera egin eta zeta bat egiten dugu ekialderantz doan bidea hartuz. Bideak, Sanejatik datorren errepidera gerturatzen gaitu, hain zuzen Puigcerdá herriaren atarian dagoen Pont de Sant Martí zubiaren sarrerara. Errepidearen beste aldera egin ondoren, zubia igaro besterik ez dugu etapari bukaera emateko.