Kanpadendarekin egiteko zeharkaldiak

Atal honetan modu autonomoan egiteko mendiko zeharkaldiak aurkituko dituzu. Zeharkaldi hauetan garrantzitsuena soinean daramagunarekin aski izatea da, garraiatu ezin ditzakegun azpiegitura edo tokialdaketetarako beste autorik erabili gabe.

Bertan aurkezten ditugun zeharkaldi gehienek ibilbide zirkularrak dituzte, hasten diren lekuan bukatuz. Noski, horrelako ibilbideak egiterako orduan, kontrolatu ez ditzakegun baldintzek haserako planak aldatu ditzakete, eta aurretik pentsatutako ibilbidea bat batean aldatu, lesio, eguraldi aldaketak, materialak kale egitea eta antzekoak direla eta. Azken finean, modalitate honetan suertatutako eragozpenei egokitzen jakitea ezinbestekoa da.

Gauak emateko hautatutako lekuak, oro har, kanpadenda bat baino gehiago jarri edota bibakean jarduteko aproposak izateaz gain, urez hornitzeko aukera dute (kontutan izan beti edateko ur bihurtzeko gailuak soinean eraman beharko ditugula badaezpada). Jakina, batzuetan aterperen bat inguruan topatzeko aukera izango duzu… noizean behin gutiziaren batekin gozatzea ere gustuko dugu eta.