GR11 31 etapa: Encamp-Esparvers 360º eta EBn

GR 11 Transpirenaika ibilbidearen 31. etapa: Encamp-Esparvers

Luzera ertaineko ibilbide honetan mendi-bide eta bideak dira nagusi. Bosc Negre basoa zaharkatuz abiatuko dugu eguna eta jarraian Madriu bailaran gora eginen dugu errekaren ondotik, Coll de Vallcivera lepotik Andorratik irten eta berriro Catalunyan sartzeko.

Zenbakiek 1400m baino gehiago igo behar ditugula dioten arren, 17 Km izango ditugu punturik gorenera iristeko, tartean eremu lau txiki bat eta jaitsiera labur bat izanik. Hau dela eta, esfortzu maila nahiko jasango dugun arren, Encamp-Esparvers txango honetan sumatuko duguna ez da nekea izango, baizik eta gozamena metroak gehitu ahala.

INFORMAZIO BALIOGARRIA

meteoblue

ELUR-BULETINA

TRACK-A DESKARGATU

NOLA IRITSI

ZAILTASUNA ETA ARRISKU MAILA

Método de Información de Excursiones (MIDE)

MIDE metodoa, mendiko ibilbideen zailtasun- eta arrisku-maila baloratzeko metodo bat da, eta Federación de Deportes de Montaña y Escalada-k (FEDME) gomendatutakoa dugu honakoa, beste federazio batzuen artean. Istripuen prebentzioa du helburu, ibilbideen eskakizun tekniko eta fisikoaren irizpideak bateratuz. Horrela, horien sailkapen objektiboagoa lortzen da.

Informazio-koadro bakoitzak bi zutabe ditu: ezkerrekoak ibilbidearen erreferentziazko informazioa du, hala nola ordutegia, desnibelak, distantzia, etab. Bestalde, eskuineko zutabean ibilbidearen zailtasunaren hainbat alderdiri buruzko informazioa agertzen da. Balioespen-eskala 1etik 5era neurtzen da (txikienetik handienera).

Metodo horrek oinarrizko informazioa ematen du ingurune aldakor batean; beraz, kontuan izan behar dugu lurraren baldintzak nabarmen alda daitezkeela. Horregatik, abiatu aurretik ibilbidearen egoera kontsultatzea gomendatzen da beti.

IBILBIDEAREN DIAGRAMA

IBILBIDEAREN TRACK-A AZTERTU EZAZU

Diagrama track-arekin sinkronizatzen da, desnibelek ibilbidean zehar izan duten bilakaera aztertzeko.
Aukeratu track-eko edozein puntu mapan, eta diagraman proiektatuta ikusi ahal izango duzu.
Egin klik erreferentzia-puntuen gainean, horiek ezagutzeko eta kanpoko mapa batean kokatzeko.

IBILBIDEAREN DESKRIBAPENA

Encamp- Coll de Jovel

BOSC NEGRE BASOKO BIDEAK

Av de Rouillac etorbidean hasten dugu gaurko eguna, hain zuzen ere Aixec erreka eta Avinguda de François Mitterrand etorbidearen artean kokatzen den zubiaren ondoren. Kalean behera jarraitzen dugu mendebalderantz, etorbidearekin topo egiten dugun arte eta jarraian aurrean eta eskuin aldean dugun etxebizitzen ondoan dagoen zolatutako oinezkoen bidetik jarraitzen dugu, norabidea mantenduz.

Zuzen jarraitzen dugu Plaça des Arínsols Enparantza esker aldean utzi arte eta lurpeko aparkalekuaren ondoko kale txikian sartzen gara. Etorbide nagusira iristerakoan, ezker aldera abiatzen den lehenengo kalean barneratzen gara eta bertatik jarraitzen dugu Sant Miquel elizaren atzealderaino. Ezker aldeko arrapalak Carrer d’Engolasters kalera eraman eta eskuin aldera jotzen dugu, HHM norabidean dagoen Carrer de l’Arenatik haratago dagoen biribilgunera iritsiz.

Biribilgunearen lehenengo eta bigarren irteeren artean kokatzen den lurrezko bidean sartu eta mendebalderantz jotzen dugu bidegurutze batera iritsi arte. Bertan, ezker aldera jo eta hegoalderantz jarraitzen dugu beste biribilgune batera iritsi arte. Beste aldera joan eta eskilarak igotzen ditugu elektrizitate lineari jarraitzen dion bidea hartzeko.

Asfaltotik at

Mendi-bideak hegoalderantz jo bezain laster gora egiten hasten da, zuhaitzen artean alde batera eta bestera eginez. Hegalaren erdialdea gainditu dugunean, bideak HM norabiderantz bira egin eta diagonal luze bat egiten du Llac d’Engolasters lakuaren inguruko pistaraino. Pistatik jarraituz, urtegiaren hormaren parean dagoen bidegurutzean, ezker aldeko arrapala gainditzen dugu, bira egin eta gutxira Engolasters-eko errepidera iritsiz. Aparkalekua inguratzen duen bihurgunea burutu baino lehen, ezker aldera dagoen informazio etxolen ondoko bidean sartzen gara, aparkaleku txikiaren ondotik. Sarbidetik 150m ibili ondoren, ezker aldean iturri bat kokatzen da.

Eskuin aldean hesia duen bidean barrena jarraituz, askaldegi bat duen lau txiki batera iristen gara. Hegoalderantz jarraitzen duen mendi-bidetik ematen ditugu hurrengo urratsak, hegalaren arrora iritsi eta jarraian Tossal de Braibal mendiaren mendebaldeko kontrahormaren hegala zeharkatzen dugu, HHM norabidean bira bat eginez. Birak hegalaren ertzean dagoen lau txiki batean bukatzen du eta bertan kokatzen da Coll de Jovel lepoa.

Coll de Jovel-Coll de Vallcivera

MADRIU BAILARAN GORA

HE norabidean lepoaren jaitsierari ekin eta Bordas de Ràmio etxolen gainetik igaro arte metroak galtzen ditugu eta jarraian, Madriu errekaren eskuinean dugula, izen bereko bailaratik gora hasten gara. Bidea agerikoa bezain harritsua dugu, hala ere, aurrera egiteko arazo handirik ez da. Errekan bukatzen duten Pletiu eta la Bova kanalen ubideak ohartu gabe atzean utzi eta Refugi de Fontverd aterpera iristen gara, aurrean duen iturria begien aurrean dugula.

Bidetik gora, Cavana de Varga etxolaren ondoren, bidegurutze batekin egiten dugu topo. Norabideari eusten diogu errekaren beste aldera egin gabe eta Tossa del Braibal eta Pic dels Llops mendiak lotzen dituen gailurreriaren oinetik jarraitzen dugu. Azken hau, IE aldera bira luze bat burutu ondoren, ikusgai izanen dugu.

Aipatutako bira hasi eta berehala zuhaitzen artetik soilgune batera irteten gara. Bailararen hondorantz jotzen dugu eta Refugi Riu dels Orris aterpea atzean utzi dugula, bailara ixten duen hegalari jarraituz, bira egiten dugu HHE aldera begira jarri arte. Ezker aldera doan hurrengo bihurgunean dagoen bidegurutzean, ezker aldeko bidea hartu eta gandor txikian gora hasten gara.

Lepora bidean

Hegala gainditzen dugu iparrerako joera mantenduz eta Estany de la Bova lakura iristen gara. Lakua inguratzen hasi eta bidearen ondoko etxolaren ondotik igaro ostean, emeki igotzen hasten gara bideak iparrera jotzen duen arte. Arrapalak gora egiten du Estany Forcat lakuari eusten dion ekialdeko mazela eta Port de Vallcivera mendiaren mendebaldeko isurialdearen artetik, Estany de la Bova eta Estany de l’Illa arteko ubidearen ondotik.

Ubidearen ondora iritsi eta enborrekin eraikitako zaldaina erabiliz, aurkako ertzean kokatzen gara. Gutxira Estany Rodó lakuaren parera iristen gara, Estany de l’Illa urtegiaren horman IE norabidean ikusgai dugula eta honen azpitik, Refugi de l’Illa aterpea.

Aterpearen kanpoaldean zerbait jan eta edan ondoren berriro bideari ekiten diogu urtegiaren hormaren eskuin aldetik lakua inguratuz. Bideak ekialderantz egiten du metro gutxiren buruan, hartxingadi bat saihestuz. Eskuin aldera bira egiten jarraitzen dugu HE norabidean kokatuta, aurrean Coll de Vallcivera lepoa gertu ikusi eta atzean Pic dels Llops mendia dugun arte.

Coll de Vallcivera-Esparvers

IKUSI ARTE, ANDORRA

Lepoaren laua zeharkatzen dugu, Tossal de la Muga mendia aurrean dugula eta lepoaren beste aldeko hegala zuzenean jaisten hasten gara. Bidea kanal batean sartzen da, bailararen hondoraino amilduz. Malda gogorra den arren, eroso jaisten gara, zolen azpiko zorua biguna dugu eta.

Ubidearekin topo egin eta hau eskuin aldean dugula ekialderantz jaisten jarraitzen dugu. Minutu gutxiren buruan seinale tantaia bat topatzen dugu, Pla de Vallcivera laura iritsi aurretik. Lauaren ondoren dagoen zuhaiztia zeharkatu eta hainbat ubideek bat egiten duten soilgune batera iristen gara (Les Tortes de Vallcivera). Bidetik perpendikularki topatzen dugun ubide nagusia zeharkatu eta bidearen alde bateko zein besteko zuhaiztien arteko soilgune batetik ekialderantz jaisten jarraitzen dugu.

Basoan sartu aurretik, soilgune estua zehar zabaldu egiten da. Basoko bidean, ubidea hartzen dugu erreferentzia gisa, mendi-bidea haren ezker aldetik doa eta uneoro. Zuhaiztitik irteten gara soilgune handi batean eta Cavana dels Esparvers etxolaren ondoan bukatzen dugu gaurkoa.