GR11 26 etapa: Estaon-Tavascan 360º eta EBn

GR 11 Transpirenaika ibilbidearen 26. etapa: Estaon-Tavascan

Estaon-Tavascan etapan burutu beharreko distantziari jaramon egiten badiogu, etapa labur baten aurrean gaudela jabetzen gara berehala, zeinetan gainditu beharreko desnibelak Coll de Jou lepoaren inguruan metatzen diren. Lurrezko mendi-bideak eta landaredi baxuko eremu irekiak nagusi diren honetan, azkar eta eroso ibili daiteke.

Coll de Jou lepotik haratago dauden herriak lotzen dituzten mendi-bideak aipatzekoak dira, bai ibiltariari eskaintzen dioten ikuspegiagatik eta baita Lo Caubo mendiaren hegal malkartsuen artean dotoreziarekin iraganagatik. Mapari soilik begiratuta, trantsizio etapa bat dirudienak, gozamenerako txangoa bilakatzen da bertatik ibilitakoan.

INFORMAZIO BALIOGARRIA

meteoblue

ELUR-BULETINA

TRACK-A DESKARGATU

NOLA IRITSI

ZAILTASUNA ETA ARRISKU MAILA

Método de Información de Excursiones (MIDE)

MIDE metodoa, mendiko ibilbideen zailtasun- eta arrisku-maila baloratzeko metodo bat da, eta Federación de Deportes de Montaña y Escalada-k (FEDME) gomendatutakoa dugu honakoa, beste federazio batzuen artean. Istripuen prebentzioa du helburu, ibilbideen eskakizun tekniko eta fisikoaren irizpideak bateratuz. Horrela, horien sailkapen objektiboagoa lortzen da.

Informazio-koadro bakoitzak bi zutabe ditu: ezkerrekoak ibilbidearen erreferentziazko informazioa du, hala nola ordutegia, desnibelak, distantzia, etab. Bestalde, eskuineko zutabean ibilbidearen zailtasunaren hainbat alderdiri buruzko informazioa agertzen da. Balioespen-eskala 1etik 5era neurtzen da (txikienetik handienera).

Metodo horrek oinarrizko informazioa ematen du ingurune aldakor batean; beraz, kontuan izan behar dugu lurraren baldintzak nabarmen alda daitezkeela. Horregatik, abiatu aurretik ibilbidearen egoera kontsultatzea gomendatzen da beti.

IBILBIDEAREN DIAGRAMA

IBILBIDEAREN TRACK-A AZTERTU EZAZU

Diagrama track-arekin sinkronizatzen da, desnibelek ibilbidean zehar izan duten bilakaera aztertzeko.
Aukeratu track-eko edozein puntu mapan, eta diagraman proiektatuta ikusi ahal izango duzu.
Egin klik erreferentzia-puntuen gainean, horiek ezagutzeko eta kanpoko mapa batean kokatzeko.

Estaon -Coll de Jou

MIRAVALL MENDIAREN ITZALPEAN

Estaon herriaren ipar aldetik abiatzen gara, ekialderantz luzatzen den kaletik. Herriaren azkeneko etxeak atzean utzi eta bailaran barneratzen den mendi-bidea hartzen dugu, ipar alderantz, ubidearen bila. Zuhaitzen artetik uraren mailara arte jaitsi eta zubia baliatzen dugu errekaren aurkako aldera zeharkatu eta ondorengo pistan sartzeko.

Errekaren ondoan jarraitzen dugu, pistatik goranzko bidean bidegurutze batek pista utzi eta errekaren beste aldetik , bide bera egiten duen mendi-bide batean sartzera behartzen gaituen arte. Mendi-bideak, metro gutxiren buruan berriro bat egiten du pistarekin eta ez du inolako lasterbiderik egiten pistaren ibilbidearekin alderatuta.

Pistaren amaierara iritsi eta aurrera jarraitzen dugu jarraian dagoen bidetik, Bordes de Nibrós etxolen ondotik igaro eta 300mtara kokatzen den bidegurutzearen parean garen arte. Eskuin aldera egiten dugu HHE norabidean diagonal luze bat eginez gandor belartsura iristen garen arte. Bertan, EIE norabiderantz bira egin eta sigi-saga eroso batek Borda de Vidal etxolaren albo batera eramaten gaitu.

Diagonal luze batek gandorraren aurkako aldeko hegalean barneratzen gaitu eta penditzan gora eginez, Coll de Jou lepoaren oinera gerturatzen gara. Zeta berri batek, hegalaren malda gogorra modu lasaian gainditzen laguntzen gaitu, lepoaren bertikalera azkar batean iritsi araziz. Azkeneko aldapa zuzen igotzen dugu.

Coll de Jou-Tavascan

LO CAUBO ZEHARKATUZ

Lepotik IE aldera jaitsi eta metro gutxira ekialderantz jaisten den mendi-bidean beheranzko bideari ekiten diogu. Garaieran lehenengo 100 metroak modu zuzenean galtzen ditu lurrezko mendi-bideak, seinale tantaia batek norabidea aldarazten duen arte. HHE aldera egin eta ur aska edo biltegi txiki bat duen landaredirik gabeko soilgune batera iristen gara. Norabideari eutsi eta ageriko bidetik jarraitzen dugu gandorrera iritsi eta berriro norabidez aldatzen dugun arte, behin eta tarte txiki bat ertzaren aurkako isurialdetik burutu dugunean.

IIE aldera bideratuta, diagonal luze batek hiru bihurgunedun sigi-saga batera eramaten gaitu. Honek, hegalaren tarte honetan, gihar eta artikulazioak behar baino gehiago estutu gabe metroak galtzea ahalbidetzen du. Sigi-sagak IE norabideari begira utzi eta aurrera jarraitzen dugu kilometro bat pasatxo bete arte. Bertan, bideak (jada pista baten itxura hartuta) HE aldera bira egin eta zeta bat marraztu ostean, Lleret herriaren goialdera iristen gara.

Lleret eta Aineto artean

Errepidean ezker aldera egin eta herrigunetik aldentzen gara ipar alderantz. Lehenengo bihurgune itxian. IIM norabidean, basoan barneratzen den mendi-bidea hartzen dugu eta honi eutsiko diogu Torrent de Blasi errekaren parera iritsi arte. Bideak, bailararen orografiari jarraituz, IE aldera egin eta minutu gutxiren buruan basotik aldentzen gaitu.

Maila berean, Lo Caubo mendiaren ekialdeko isurialdea zeharkatzen dugu, hegala alderik alde moztu ondoren, berriro basoan sartzen garen arte, Canal del Bosc kanalaren inguruan. IIE aldera jaisten hasten gara Canal de Fonsenrós kanalera hurbilduz. Hemen bai, malda areagotu egiten da. Zuhaitzen artetik irteten gara soilgune batean, bertan, honen hego-mugan mantentzen gara, zuhaiztia eskuin aldean dugula.

Pasarte honetan, begiratzen dugun maparen arabera, GR11 bideak eremu desberdinak zeharkatzen ditu. Gure txangoan, zuhaiztia eskuin aldean dugula, honen albotik jaisten gara penditzan zuzen, azpialdean amiltzen den maila eskuin aldetik gainditzeko. Gainditu ahala, iparrera bira egin eta honen azpitik gurutzatuz, kanala mugatzen duen ertzera gerturatzen gara, ekialderantz bira egin eta zuhaitzen ondotik beheranzko bidean jarraituz agerikoen ikusi dugun bidetik. Metro batzuk beherago, bihurgune batek kanalaren beste aldera eramaten gaitu.

Beherago dagoen bidegurutzean, zuzen jarraitu dezakegu, zeharka dagoen pistaren beste aldetik lasterbidea egiteko edo eskuin aldera jo, pistatik lasai eta erosoago jaisteko. Hormigoizko bidera iritsi aurretik, mapen arabera, ezker aldean iturri bat kokatzen den arren, ohartu gabe aurrera egin genuen.

Azkeneko metroak

Aineto herrira iritsi eta aurrean dauzkagun bi kaleen artean, ezker aldetik, goranzko bidea egiten duena hartzen dugu, herriaren goialdetik ekialderantz jarraituz. Herriaren irteeran dagoen elektrizitate edo telefono kabledun zurtoin baten ondotik abiatuta jaisten den mendi-bidean sartzen gara, errepidearen ondotik baino maila altuago batean Tavascan aldera joateko.

Kilometro bete burutu gabe, Tavascan herriaren mendebaldeko atarira iristen gara. Bertan, seinale tantaia batek hartu beharreko norabidea zehaztu eta ohiko margo txuri eta gorriak jarraituz, ekialderantz bideratzen gaituzte Riu de Tavascan errekara iritsi arte. Aurkako aldera egiten dugu zubitik eta etapa bukatutzat ematen dugu Monumento a la Aguadora monumentuaren ondoan.