GR11 05 etapa: Auritz-Hiriberri 360º eta EBn

GR 11 Transpirenaika ibilbidearen 5. etapa: Auritz-Hiriberri.

Aezkoako baso miresgarriak ezagutzeko aitzakia ederra ematen duen jardunaldia. Zatirik handiena itzaletan egiten denez, egun eguzkitsuetan gozatzeko modukoa erabat. Bidearen zati nagusiena pista eta mendi-bide zabaletan ematen da eta seinaleztapen arazorik ez dago.

INFORMAZIO BALIOGARRIA

meteoblue

ELUR-BULETINA

TRACK-A DESKARGATU

NOLA IRITSI

ZAILTASUNA ETA ARRISKU MAILA

Método de Información de Excursiones (MIDE)

MIDE metodoa, mendiko ibilbideen zailtasun- eta arrisku-maila baloratzeko metodo bat da, eta Federación de Deportes de Montaña y Escalada-k (FEDME) gomendatutakoa dugu honakoa, beste federazio batzuen artean. Istripuen prebentzioa du helburu, ibilbideen eskakizun tekniko eta fisikoaren irizpideak bateratuz. Horrela, horien sailkapen objektiboagoa lortzen da.

Informazio-koadro bakoitzak bi zutabe ditu: ezkerrekoak ibilbidearen erreferentziazko informazioa du, hala nola ordutegia, desnibelak, distantzia, etab. Bestalde, eskuineko zutabean ibilbidearen zailtasunaren hainbat alderdiri buruzko informazioa agertzen da. Balioespen-eskala 1etik 5era neurtzen da (txikienetik handienera).

Metodo horrek oinarrizko informazioa ematen du ingurune aldakor batean; beraz, kontuan izan behar dugu lurraren baldintzak nabarmen alda daitezkeela. Horregatik, abiatu aurretik ibilbidearen egoera kontsultatzea gomendatzen da beti.

IBILBIDEAREN DIAGRAMA

IBILBIDEAREN TRACK-A AZTERTU EZAZU

Diagrama track-arekin sinkronizatzen da, desnibelek ibilbidean zehar izan duten bilakaera aztertzeko.
Aukeratu track-eko edozein puntu mapan, eta diagraman proiektatuta ikusi ahal izango duzu.
Egin klik erreferentzia-puntuen gainean, horiek ezagutzeko eta kanpoko mapa batean kokatzeko.

IBILBIDEAREN DESKRIBAPENA

Auritz - Usategieta

AEZKOAKO BASOETAN BARRENA

Kale nagusiaren perpendikularretik abiatzen den elizaren ondoko kaletik abiatzen gara EHE norabidean. Errekara iritsi eta zubia igarotzen dugu bidegurutzera iristeko. Bertan, ezkerretara egiten dugu IE norabidean, zuhaitzen itzaletara.

Hurrengo ageriko bidegurutzera iristen gara. Bidearen beste aldean dagoen metalezko ataria gurutzatzen dugu, Oiarburu aldera jotzen duen bidea hartuz, ekialderantz. Pistatik aurrera eginez, aipatutako gailurraren ondotik igarotzen gara konturatu gabe.

HHe norabidera zabaltzen den bira bat egin ondoren, pista alderik alde ixten duen beste atari bat topatzen dugu, bidegurutze baten erdian. Bertan, ia buelta osoa egiten dugu ezker alderantz, IM norabidea hartuz, gandorrean dagoen ezkerreko hesiaren ondoko bidetik.

Aurrerago, IE norabiderantz egiten dugu, basoaren ekialdeko mugan kokatuz, Bagoxurietako gainaren ondoan. Zuhaitzen ondotik IM norabidean jarraitzen dugu, ondoren, IE norabiderantz bira bat abiatuz. Bertan pista nagusira ateratzen gaituen bidegurutzea topatzen dugu aurrez-aurre. Pistan sartzen gara, eskuin aldera eginez, orain arte bezala, basoaren mugaren ondotik jarraitzeko, eta pista jarraitzen dugu ekialderantz, sigi-saga eginez.

Laparordokigañako hego mazelara iristean, bideak berriro basoan sartzen gaitu Iparrerantz egiten duen bihurgune baten ondoren. Gutxira, HE norabidea hartu dugunean, basotik irteten gara berriro, Usategietako leporantz emeki jaisten garen bitartean.

Usategieta - Orbaran

MENDI-BIDE ETA PISTEN ARTEAN

Usategietako lepoko bidegurutzetik hiru bide eta adar bat abiatzen dira, hortaz, metalezko atariaren ondoan kokatzen den seinale-tantaia eskertzekoa da oso. Ataria gurutzatu eta eskuin aldeko bidea hartzen dugu. Bide hau, hego norabidean gorantz egiten du hasieratik, zuhaiztiaren artean, Egiluzea gaina eskuin aldean utziz.

Lepotik oso gertu, 200 bat metro egin ditugunean, gailurraren ondotik igarotzen gara, beste behin ere, konturatu gabe. Bidea lautu egiten da eta gandorretik ekialderantz lasai ibiltze gara zuhaitz, sasi eta iratzeen artean, ageriko bidetik.

Bideak hegoalderantz egiten du Latxaga mendiaren ipar mazelari aurre eginez. Pistara iritsi garenerako, jada malda areagotzen hasi da. Pistan gora egiten dugu, zeta zabal bat eginez. Honen goialdean, HHM norabidean igotzen den mendi-bidea hartzen dugu, magala diagonalean zeharkatu eta basotik irtetzen gara bizkarraren azpian. Bertatik ederki nabarmentzen da inguruko basoekin daukagun altxorra.

Hesiaren ondotik metro batzuk egiten ditugu, berriro basora iritsi arte. Ataka igaro, eta norabidez aldatzen dugu, ekialderantz igotzen jarraitzeko. Bizkarraren goialdera iritsi, eta bat batean hegoalderantz jaisten hasten gara, basotik urrunduz.

Bideak, garaiera mantentzen du, basoaren mugaren ondotik dihardun bitartean EHE norabidean eta aurrerago, hegoalderantz jarraitzen du, Odieta aurretik dagoen bidegurutzera eramaten duen pistan bukatzeko. Bidegurutzean, norabidea aldatu gabe, aurrera jarraitzen dugu, Odieta ezkerretara utziz, gailur bat baino, muino soil bat bailitzan.

Hurrengo basora iristen gara. Oraingoan, bideak ekialderanzko joera mantentzen du betiere orografiaren baitan. Hasiera batean lau eta aurrerago zuzenean maldan behera eginez.

Basoaren behealdeko eremu honetan, trantsizio bat ere gertatzen da, baso zabalaren erosotasunetik, adar baxuko baso itxi batetara igarotzen gara. Hemendik aurrera, bidea hegoalderantz amiltzen da, sekulako ibilbide polita eginez, Orbarara iritsi arte.

Orbaran - Hiriberri

BERRENDIRA GERTURATZEN

Orbarara iparretik iristen gara eta norabidea aldatu gabe, elizaren ondotik igarota, hegoaldetik irteten gara, errepideraino. Errepidean, eskuin aldera egiten dugu, ezker aldera jaisten den bidetik joateko. Bide hau, ura isurtzeko kanal bat erdian duen hormigoizko pista bat dugu.

Hormigoia bukatu eta bide bera jarraitzen dugu, pistatik. Bideak, IE aldera bira bat egiten du, errekaraino. Erreka zubitik igaro, eta aurrerago dagoen ezkerrerako bihurgunearen erpinean bertan, mendi-bidean sartzen gara. Epuruko bidea, alboetatik erabat itxita duen mendi-bidea dugu, oso agerikoa.

Malda ertainean gora egiten du HE norabidean 200mko garaieran zehar, Orbaxtako bideko pistan bukatu arte. Pistan sartu eta HM norabidean jarraitzen dugu bidegurutze batetara iritsi arte, ikusten dugun lehenengo eraikinaren ondoan. Hegoalderantz jaisten den kalean behera egiten dugu eta Hiriberrira iristen gara HE norabidean.

Herrian gaudela, kale beretik aurrera egiten dugu, galtzada harriko bideak tabernaren terraza ezker aldean, eta eta bi mailatako aska eskuin aldean izan arte. Bide nagusiak, eskuin aldera egiten du, baina gu, HHE norabidean jarraitzen dugu, zuzen eginez, aurreko etxearen eta bordaren arteko kaletik. Aurrera egin eta bidegurutze batera iristen gara. Aurrez aurre, elizaren kanpai dorrea ikusi behar dugu, alboko kontrahormarekin batera.

Bidegurutze horretan, ezkerrera egiten dugu eta ezkerretara mantendu, IE norabidean, kalean gora egiteko. Arginena etxearen ondotik igaro eta honen atzetik igotzen den eskuin aldeko kalea hartzen dugu. Ekialderantz egiten dugu, azkeneko etxearen harresia ezkerretara utziz. Bertan hasten da hurrengo etapa.